Poetry
Poem: Nagsusulat ka pa ba?
2:29 AM
Nagsusulat ka pa ba?
Rogue Mercado
Nagsusulat ka pa ba?
Ng mga liham na ayaw mong ipadala;
Ng mga mensaheng ayaw mong ipabatid;
Ng mga imaheng ayaw mong ipamasid?
Nagsusulat ka pa ba?
Ng mga liham tungkol sa babaeng katabi;
Ng mga mensaheng nasa likod ng kanyang kwaderno;
Ng mga imahe niyang iginuguhit mo bago ka
matulog?
Nagsusulat ka pa ba?
Ng mga liham tungkol sa lalaking kaharap;
Ng mga mensaheng nasa likod ng kanyang upuan;
Ng mga imaheng iyong nililigawan bago kumain?
Nagsusulat ka pa ba?
Ng mga liham ng babaeng nasa panaginip;
Ng mga mensaheng gusto mo siyang iduyan sa
harana;
Ng mga imaheng rosas na iyong inaalay?
Nagsusulat ka pa ba?
Ng mga liham ng lalaking nasa imahinasyon;
Ng mga mensaheng aawitin sa iyo sa durungawan;
Ng mga imaheng gumamela na kanyang sinabit sa
iyong tenga?
Nagsusulat ka pa ba?
Ng mga liham ng iyong diwa;
Ng mga mensaheng masidhing kagustuhang mamili;
Ng mga imaheng gusto mong mag-isang dibdib?
Magsusulat ka pa ba?
Kung ang liham ay dapat may tema;
Kung ang mga mensahe ay nakakulong sa iisang
kasarian;
Kung ang mga imahe ay nakagapos sa payak na
paraiso lamang?
Ngunit-
Nagsusulat ka pa ba?
Ng mga liham na walang gusto magbasa;
Ng mga mensaheng walang sapat na tatak;
Ng mga imaheng kailangan piliin tulad ng
palikuran?
*Para sa mga kaibigan kong gusto ay dalawa.
0 Violent Reactions!
Say anything you want! Rogue Mercado doesnt bite! :D